​ദോഹ: രാജ്യത്തെ മുനിസിപ്പൽ സേവനങ്ങളുടെ കാര്യക്ഷമത വർദ്ധിപ്പിക്കുന്നതിനും പരിസ്ഥിതി സുസ്ഥിരത ഉറപ്പാക്കുന്നതിനുമായി അത്യാധുനിക പരിസ്ഥിതി സൗഹൃദ വാഹനങ്ങളും ഉപകരണങ്ങളും ഖത്തർ നഗരസഭ മന്ത്രാലയം (Ministry of Municipality) പുറത്തിറക്കി. പരിസ്ഥിതി സംരക്ഷണം മുൻനിർത്തി മന്ത്രാലയം നടപ്പിലാക്കുന്ന വിപുലമായ പദ്ധതികളുടെ ഭാഗമായാണിത്.
​പൊതുജനാരോഗ്യ സേവന വിഭാഗം അസിസ്റ്റന്റ് അണ്ടർസെക്രട്ടറി എഞ്ചിനീയർ അബ്ദുള്ള അഹമ്മദ് അൽ കരാനി പുതിയ വാഹനവ്യൂഹത്തിന്റെ ഉദ്ഘാടനം നിർവഹിച്ചു. മികച്ച പാരിസ്ഥിതിക മാതൃകകൾ സ്വീകരിക്കുന്നതിലൂടെ വായുവിന്റെ ഗുണനിലവാരം മെച്ചപ്പെടുത്താനും ഫീൽഡ് വർക്കുകൾ കൂടുതൽ വേഗത്തിലാക്കാനും ഈ നീക്കം സഹായിക്കുമെന്ന് അദ്ദേഹം പറഞ്ഞു.ഏറ്റവും പുതിയ ആഗോള പരിസ്ഥിതി മാനദണ്ഡമായ 'യൂറോ 6' (Euro 6) എൻജിനുകളാണ് ഈ വാഹനങ്ങളിൽ ഉപയോഗിച്ചിരിക്കുന്നത്. ഇത് ഹാനികരമായ പുക പുറന്തള്ളുന്നത് കുറയ്ക്കുകയും ഇന്ധനക്ഷമത വർദ്ധിപ്പിക്കുകയും ചെയ്യുന്നു.കുറഞ്ഞ ശബ്ദത്തിൽ പ്രവർത്തിക്കുന്ന ഈ വാഹനങ്ങൾ നഗരങ്ങളിലെ ശബ്ദ മലിനീകരണം കുറയ്ക്കാൻ സഹായിക്കും.അത്യാധുനിക വാണിംഗ് ലൈറ്റുകൾ, റിഫ്ലക്റ്റീവ് ഘടകങ്ങൾ എന്നിവയുൾപ്പെടെയുള്ള സുരക്ഷാ സംവിധാനങ്ങൾ വാഹനങ്ങളിൽ ഒരുക്കിയിട്ടുണ്ട്.സുസ്ഥിര നഗരങ്ങൾ എന്ന ലക്ഷ്യത്തിലേക്ക് ഖത്തർ നടത്തുന്ന യാത്രയിൽ ഈ പുതിയ വാഹനവ്യൂഹം ഒരു സുപ്രധാന നാഴികക്കല്ലാണെന്ന് മെക്കാനിക്കൽ എക്യുപ്‌മെന്റ് വിഭാഗം ഡയറക്ടർ ഷെരീദ സുൽത്താൻ അൽ റുമൈഹി വ്യക്തമാക്കി. പൊതുശുചിത്വ പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനും ജനങ്ങൾക്ക് മികച്ച സേവനം നൽകുന്നതിനും ഈ നവീകരണം കരുത്തുപകരും.